Corn Island (2014)

 

ජෝර්ජියාව හා අබ්කාසියා රාජ්‍යය අතර සීමාව සළකුණු කරමින් ගලා බසින ඉන්ගූරී ගංගාව කොකේසස් කඳුවැටියේ සීතල ග්ලැසියර කලාපයෙන් ආරම්භ වී කළු මුහුද හා මුසුවෙයි. සෑම වසන්ත ඍතුවකම මෙම ගංගාව කොකේසස් කඳුවැටියෙන් සූරා ගන්නා සාරවත් පස පහළ තැනිතලාවට රැගෙන විත් අබ්කාසියා හා වයඹදිග පෝර්ජියාවට අයත් ප්‍රදේශවල ගංගාව මැද කුඩා දූපත් රාශියක් නිර්මාණය කරයි. මේ දූපත් වලට නීත්‍යානුකූලව අයිතිවාසිකම් කීමට කිසිවෙක් නොමැත. ඉක්මන් වන්නාට මෙම අලුත් භූමිවල තාවකාලික හිමිකාරීත්වය ලබාගත හැක.

වසන්ත ඍතුවේ එක් දිනක මහළු අබ්කාසි ගොවියෙක් ඉන්ගූරී ගංගාවේ මතුවී ඇති කුඩා දූපතක⁣ට පා තබා එහි තාවකාලික හිමිකාරීත්වය ලබාගනියි. ඉන්පසු, තම මිණිබිරියගේ ද සහය ඇතුව කුඩා මඩුවක් ඉදිකරන ඔහු, දුපතේ ඉරිඟු වැවීමට පටන් ගනියි. සීයා හා මිණිබිරිය අතර කතාබහක් ඇතිවන්නේ නැති තරම්ය. සාරවත් පසේ ඉරිඟු පැල සරුවට ලියලා වැඩෙන අයුරු මහළු මිනිසා බලා සිටින්නේ මහත් සොම්නසකිනි. 

ගංගාවෙන් මායිම් වන රටවල් අතර ඇතිවී තියෙන වාර්ගික ගැටුම් සහ දේශපාලන ආතතිය නිසා මෙම කුඩා ඉරිඟු දූපත අසලින් අවි දරාගෙන ගමන් කරන ජෝර්ජියානු, රුසියානු හා අබ්කාසි සොල්දාදුවන් නිතර දැකගත හැකිය. මහළු ගොවියා මෙම සොල්දාදුවන් සමඟ පවත්වන්නේ සීමිත සම්බන්ධයකි. ඔහු වැඩිමනක් බිය වී සිටින්නේ නව යොවුන් වියේ එළිපත්තේ සිටින තම මිණිබිරියගේ ආරක්ෂාව කෙරෙහිය. නමුත්, යුද්ධයෙන් තුවාල ලබා පැමිණෙන ජෝර්ජියානු සොල්දාදුවෙකුට උපස්ථාන කිරීමට මෙම කාරුණික ⁣මිනිසා දෙවරක් සිතන්නේ නැත. 

වැසි සමය ආරම්භ වී දූපත ගංවතුරෙන් යටවී අතුරුදහන් වීමට පෙර මහළු ගොවියාට හා දැරියට ඉරිඟු අස්වැන්න නෙලාගැනීමට හැකි වේද?